Կամբոջայի Թագավորությունում ՀՀ դեսպան Վահրամ Կաժոյանի հանդիպումը Կամբոջայի Թագավորության Արտաքին գործերի և միջազգային համագործակցության նախարարության պետքարտուղար Չեմ Վիդհյայի հետ:

18 օգոստոսի, 2022

2022 թ. օգոստոսի 18-ին Կամբոջայի Թագավորությունում ՀՀ դեսպան Վահրամ Կաժոյանը հանդիպեց Կամբոջայի Թագավորության Արտաքին գործերի և միջազգային համագործակցության նախարարության պետքարտուղար Չեմ Վիդհյայի հետ:

Հանդիպման ժամանակ կողմերը քննարկեցին Հայաստանի և Կամբոջայի միջև երկուստեք հետաքրքրություն ներկայացնող ոլորտներում համագործակցության, միջազգային կազմակերպություններում համագործակցության հետագա զարգացումը և խորացումը, երկու երկրների արտաքին գերատեսչությունների միջև Պնոմպենում երկրորդ քաղաքական խորհրդակցությունների անցկացումը, դիվանագիտական ակադեմիաների միջև փոխըմբռնման հուշագրի կնքման հնարավորությունը, Առևտրա-արդյունաբերական պալատների համագործակցությունը, երկու երկրների խոհանոցների միամսյակների անցկացումը, մուտքի արտոնագրերի ազատականացումը և այլ հարցեր, ինչպես նաև մտքեր փոխանակեցին տարածաշրջանային զարգացումների վերաբերյալ:

Կամբոջայի Թագավորության Արտաքին գործերի և միջազգային համագործակցության նախարարության պետքարտուղար Չեմ Վիդհյան համառոտ ներկայացրեց Կամբոջայի արտաքին քաղաքականության առաջնահերթությունները՝ Չինաստանի Վիետնամի, Ռուսաստանի, ԱՄՆ-ի ու ԵՄ-ի հետ երկկողմ, ինչպես նաև բազմակողմ հարթակներում:

Իր հերթին Կամբոջայի Թագավորությունում ՀՀ դեսպան Վահրամ Կաժոյանը համառոտ ներկայացրեց Հայաստանի Հանրապետության արտաքին քաղաքականության հիմնական ուղղությունները և առաջնահերթությունները: Դեսպան Կաժոյանը տարածաշրջանային զարգացումների վերաբերյալ մտքերի փոխանակման համատեքստում, նաև անդրադարձավ Ադրբեջանի կողմից 2020 թ. սանձազերծած 44-օրյա պատերազմին և դրանից հետո ստեղծված իրավիճակին՝ մասնավորապես Ադրբեջանի կողմից պահվող հայ ռազմագերիների և Ադրբեջանի կողմից վերահսկվող Արցախի տարածքներում հայկական մշակութային ժառանգության ոչնչացմանն ու խեղաթյուրմանը, մարդու իրավունքների բազմաթիվ կոպիտ խախտումներին:

Զրուցակիցները նաև քննարկեցին Հայաստանի և Կամբոջայի միջև համագործակցության զարգացումն առևտրա-տնտեսական ոլորտում՝ հայկական ապրանքատեսակների և մասնավորապես Արարատ կոնյակների Կամբոջա ներկրման հնարավորությանը:

Հանդիպման ժամանակ կողմերը պայմանավորվածություններ ձեռք բերեցին պարբերաբար հանդիպել, միևնույն ժամանակ պահպանելով մշտական էլեկտրոնային կապ, բոլոր բարձրացված հարցերն իրագործելու նպատակով:

Կամբոջայի Թագավորությունում ՀՀ դեսպան Վահրամ Կաժոյանի հետ հանդիպմանը մասնակցում էր Կամբոջայի Թագավորության արտաքին գործերի և միջազգային համագործակցության նախարարության Եվրոպայի գլխավոր վարչության պետ Հոյ Պիչրավուտը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր